Ц.Гайтав "Монгол эх"

Саран гоо төрсөн

Сайхан монгол эхийн
Үр нь болсон бидэнд
Үзэг барьсан надад
Эхийн ачийг хариулах
Бэхийн ихийг зориулах
Нарны дор амьдарсны
Насны ариун үүрэг бий.
Булцгар нялх үеэсээ
Бумбагар жаахан цагаасаа
Булчин сууж өстлөө
Буурал болж өтөлтлөө
Монгол эхийн хайраар
Мөнх л бид дулаацаж
Сэтгэлийн өвлийг үзсэнгүй
Сэв тортог харсангүй ээ.
Бүүвэйн сайхан дуунд нь
Бүгд тавтай нойрсож,
Буянтай ариун сүүг нь
Бувар бувар амталж
Оёж өгсөн хувцасы нь
Оодгор болтол өсөж.
Олонцоглож өгсөн эмээлий нь
Олмыг тасартал тэнхээжиж
Эхийн хайрыг үзэхдээ
Эрдэм ажил сурахдаа
Энд тэнд явахдаа
Эргэж бас уулзахдаа
Үс буурал боллоо гээд
Үнсүүлэхээ бид байдаггүй
Нас дээр гарлаа гээд
Үрээ бид больдоггүй
Хүүхэд байх цагаасаа
Аашны нь сайханыг авлаа
Хүргэн бэр болохоосоо
Ажлы нь сайныг дуурайлаа
Зүү барьдаг гараас нь
Үйл үртэс сурлаа
Зүтгэл ихт чанараас нь
Айл гэрээ додомдлоо
Ингэ мал саадаг
Идээ цагаа хийдэг,
Хүнийг хайрладаг ёс
Хүндэлж энэрдэг тус
Хамаг нандин чанарыг
Хайрт эхээсээ сурлаа
Дөмөг бүхний нь дээжээр
Төвшин бат ирлээ
Үрдээ ханддаг эх шиг
Үй түмэндээ хандаж
Төрдөө бид төвшин
Түмэндээ бид зүтгэж
Эхийн ачийг хариулах
Бэхийн эхийг зориулах
Нарны дор амьдарсны
Насны гавьяа байгуулна.
Энэ биенд байгаа
Эрхэм сайхан бүхнээ
Эх хүний хайрласан
Эрдэнэ гэж үздэг
МОНГОЛ сайхан эхийн
Үр болсон бид
Цэнгэлийн манлайд хүрэх
Үйлсийн зүг тэмүүлнэ.
-1964 он-